Ağa Musanın “Qara Şəhər”də 6-cı Çernoqorodskaya və 2-ci Zavaqzalnı (hazırkı N.Əliyev 10) küçələrinin kəsişdiyi yerdə böyük bir sahəni (100 ha) əhatə edən 2 mərtəbəli xüsusi olaraq tikdirdiyi binasında İranın Sərab şərindən gələn köçkünlər yerləşdirilmişdi. Hansılar ki, sonradan 1918-ci ilin mart qırğınları zamanı sözün əsl mənasında “ətdən” çəpər kimi düzülüb, düşmənin neft zavodları olan məkana girməsinə yol verməmişlər.
Hadisələrdən atasının danışıqlarından xəbərdar olan, binanın indiki sakini 70 yaşlı İsmayıl Tençurin, milliyyətcə tatar olan bir nəfər ilə görüşüm zamanı aydın oldu ki, bina “Amerikanka” və “Naqiyevskiy dvor” adı ilə məşhur olub. Hazırda binanın yarısında yeni 23 mərtəbəli müasir bina ucaldılıb. Əvvəllər bu binanın yerində Ağa Musanın Çörək Sexi olub. Bina ilə üzbə üzdə “Qadın həbsxanası”nın yerində isə Ağa Musa Nağıyevin un ambarı olub.
Günün axırında, binanın ambara baxan tərəfində, bu günədək görkəmini saxlayan taxta eyvanda (fotoda görünən taxta eyvanlı bina da yenicə sökülüb... ), Ağa Musanın un kisələrinin arabadan boşaldılmasını izlədiyini söyləyib əlavə etdi ki, Ağa bunu özündən başqa heç kimə inanmadığından edirmiş. İ.Tençurin onu da əlavə etdi ki, atam deyərdi - Ağa Musa çox səxavətli olub, amma yalana və aldanmaya yol verməzdi.